قرية غزال الريم للماكولات البدويه

القعدات الحلوة دى مش فى دهب ولا نويبع
دة فى التجمع تخيل كدة تبقى قاعد فى خيمة شفافة فى وسط الصحرا و النار شغاله حواليك و مش حاسس بالسقعه خالص وفى نفس الوقت شايف كل حاجة قدامك من اول الارض لحد السما
لو بتدور على مطعم بقعدة زى دى يبقى تطلع على الغابة المتحجره فى التجمع وتعيش احلى اجواء وعلى فكرة الاكل عندهم كويس لانهم متخصصين في الاكل البدوي،
عاملين افران مندي تحت الارض و اللحمة و الفراخ بتستوي في الافران دي بال ٣ ساعات و تطلع اللحمة دايبة و ناعمة زي الزبدة .. احلى لحظة لما بيطلعوا فيها الاكل و يبقى البخار طالع منه بالريحة الجميلة دي و طبعاً الاكل دا بيبقى احلى اكل في الدنيا
مفيش منيمم تشارج، انت ممكن تطلب اي حاجة من المنيو، نص فرخة او نفر مندي، او صينية فيها مشكل لحم، فراخ، حمام .. و تتفرج على شو شلال الملوخية
العيش كمان بيعملوه عال صاج بالطريقة البدوى، و مفيش كام ثانية يتلاقي رغيف العيش الفراشيح جاهز للاكل على طول
يا سلام بقى لو بعد الاكل تقوم ضاربلك واحدة كنافة مع براد شاي .. مزاااااج
ديكورات المكان حلوة اوي، اعمل حسابك انك هتتصور شوية حلوين "بالنهار و بالليل" تستمتع بالاغاني البدوي و الخيم حواليك في كل مكان
خروجة حلوة اوي مش مطعم عادي تاكل فيه بس .. انت هتحس إنك سافرت تغير جو وتفصل شوية
كل حاجة خيم بس الحمامات عادية عشان متأكد إن في ناس كتير بتشيل هم الحتة دي خصوصا لو معاهم أطفال